O xoves estivemos na Praia de Beo, en Malpica de Bergantiños, nunha xornada de acción e conciencia ambiental. En colaboración con One Surf Academy, unha escola de surf local comprometida coa preservación da contorna natural, levamos a cabo unha limpeza que forma parte do proxecto Praias libres de Plásticos de limpocean, subvencionado pola Deputación da Coruña.
Durante a actividade, recolléronse 60 kg de plásticos e residuos, unha cifra quemostra o impacto humano nos nosos ecosistemas costeiros e a necesidade urxente de actuar. Entre os materiais recolleitos, destacaron bolsas, botellas e microplásticos, pero o que máis nos sorprendeu foi o achado dunha cantidade significativa de bólas de chapapote.
De onde vén este chapapote?
O chapapote, restos de hidrocarburos solidificados que se adhiren á area e as rocas, é un recordatorio dos desastres ambientais que afectaron as nosas costas no pasado. Aínda que descoñecemos a orixe exacta das bólas atopadas en Beo, este achado subliña a importancia de seguir loitando por manter as nosas praias libres de contaminación.
Un esforzo conxunto polo medioambiente
A xornada non só foi unha acción de limpeza, senón tamén un momento de reflexión sobre o impacto que as nosas decisións teñen na contorna. Desde limpocean e One Surf Academy , destacouse a importancia de educar ás novas xeracións sobre prácticas sostibles e o respecto pola natureza.
O proxecto Praias Limpas de Plásticos continúa o seu labor de mobilizar a comunidades e axentes locais na protección das nosas costas, demostrando que con esforzo colectivo podemos lograr un cambio real.
Grazas por sumar
Agradecemos a todas as persoas que participaron nesta actividade e animamos á comunidade de Malpica e arredores a unirse a futuras iniciativas. Cada pequeno xesto conta para preservar a beleza e saúde das nosas praias.
Xuntos podemos marcar a diferencia.
