No marco da segunda parte do proxecto Praias libres de Plásticos, impulsado por limpocean e subvencionado pola Deputación da Coruña, os estudantes do CEIP Fogar de Carballo levaron a cabo tres intensas xornadas de limpeza ambiental. Estas actividades, que se realizaron co alumnado de 3º, 5º e 6º curso, tiveron lugar na praia de Razo e nas Marismas de Baldaio, dous enclaves naturais emblemáticos do Concello de Carballo.
Coa participación de máis de 250 nenos e nenas, acompañados polos seus profesores e o equipo de limpocean, logramos retirar máis de 410 quilogramos de plásticos e residuos. Este esforzo colectivo non só axudou a limpar estes espazos, senón tamén a concienciar aos máis novos sobre a importancia de coidar o medio ambiente.
Residuos, reflexións e sorpresas
Ao finalizar cada xornada, os residuos colleitados pesáronse e separaron, permitindo analizar que tipos de refugallos predominaban. Este proceso foi revelador para o alumnado, que quedou sorprendido ao ver a cantidade total acumulada na lona de recolección. Durante a actividade, cada grupo levaba as súas propias bolsas de limpocean, o que lles facía difícil imaxinar o gran volume de refugallos que se acumulou.
Outra fonte de asombro foi a variedade de obxectos atopados. Entre os residuos habituais, como plásticos e vidros, apareceron elementos inesperados e curiosos: un colchón, unha roda de tractor, un asento de inodoro, e mesmo un barril de petróleo cheo. Este último foi retirado coa axuda do Concello de Carballo.
Educación ambiental en acción
Máis aló da limpeza, estas xornadas tiveron un impacto educativo significativo. Os nenos e nenas non só aprenderon sobre a importancia de reducir e reciclar, senón tamén sobre como os residuos afectan os ecosistemas costeiros e mariños. A experiencia de traballar xuntos para protexer a súa contorna motivoulles a seguir reflexionando sobre os seus propios hábitos de consumo e residuos.
limpocean agradece o apoio da Deputación da Coruña e ao CEIP Fogar, así como o compromiso do profesorado e do alumnado participante. Este esforzo colectivo demostra que, con educación e acción, é posible marcar unha diferenza positiva para o medio ambiente e para as futuras xeracións.
