Última actividade do mes cunha nova cunha limpeza da praia, onte tocou a praia de Riazor, en colaboración con estudantes Erasmus e a rede ESN (Erasmus Student Network). A pesar de atoparnos na primavera, a xornada estivo marcada por un clima soleado e temperaturas propias dun día de agosto, o que acompañou perfectamente o desenvolvemento da actividade.
Riazor, como praia urbana e unha das máis emblemáticas da cidade da Coruña, adoita presentar nestas datas un estado de limpeza mellor que noutros momentos do ano. Aínda así, durante a acción recolléronse ao redor de 20 kg de pequenos plásticos e outros residuos, o que pon de manifesto a presenza de contaminación menos visible, pero igualmente prexudicial para o medio mariño.
Máis aló da cantidade, esta foi unha limpeza de calidade,deixamos enlace para que vexades un video da limpeza, centrada na sensibilización e o intercambio de experiencias. Ao longo da actividade xeráronse interesantes conversacións coas persoas participantes, compartindo como se atopan as praias e as contornas naturais nos seus países de orixe e reflexionando sobre a situación ambiental actual a nivel internacional.
Este tipo de encontros reforzan a importancia da cooperación e a concienciación global para afrontar o problema dos residuos plásticos, especialmente en espazos naturais tan valiosos como as nosas praias da provincia da Coruña.
Esta actividade enmárcase dentro do proxecto A Costa da Coruña Limpa de Plásticos, que conta co apoio da Deputación da Coruña.
